Trei cobie più una
Chel perché che no se lascia ciapar ite
Cocciante l ciantaa "se stiamo insieme ci sarà un perché". L spetaa Cocciante, ciantan, na responeta che aesse cognù ruar en chela sera. Giusta per: el l'era ja stat molà e la cobia ja no la era più cobia. Del rest, sessaben, de chela cianzon no se sà nia, se no l refrain. Chel l cianton duc. Chel perché che tegn ensema na cobia. Sebenence. La vita che passa. Le esperienze che ne muda e che muda, l dejider de zeche de auter. Più nef, facinant, fresch, curious. Più. L'é ence n liber col medemo titol de la cianzon de Cocciante. Un decalogh per aer legreza de cobia. Istruzion per la doura.
La legreza, se sà, la slizia demez. Chel perché l resta per aria. Saràl zachei bogn de l ciapar ite.
L'é na cobia de na certa età. Vigni de la setemana, fora che de domenia, per dut l'an, i à l medemo ritual. Da doman. Semper l medemo. Semper ic doi adum. De doi l tol l caret e i lo mena te piaz. Dapò i met ensema l stond toch per toch. A i veder somea dut sorì. Probabile l'é dut colaudà da egn. Per tacar ite l tendon ela la va su sun n scagnel e el ge passa l pal. Ela, ence se d'età, la é forta e no la bazila. El va da na man a l'autra e l pal l'é tacà su. Dessema i met fora le robe sul caret. I cartìe co la magnadiva a le oute l li taca su ela, autre el. Entan l sfoi l'é bel slargià sul caret. A le oute lec ela, autre el. Con ousc forta acioche l'auter sente. A turno, i lec le notizie. Ela o el, a seconda, se arvejina e disc zeche. I doi ciaves bienc i é vejins e i deventa un. A i veder, vigni di, te chela quotidianità, se veit, se tocia beleche, la sintonia anter de ic, n esser doi che l'é ence esser un. Na sinfonia ciarnala.
La seconda cobia l'à vedù passar più egn de la pruma. El l'é mie vejin de banch a messa. El l va duc i dis, gio ogni tant. Noscia bancada l'é chela per chi mìngol sorc. Se meton, el tedant, gio vindò, vejin a l'autoparlant. El l se arvejina a chest demò canche l'é le parole del Vangele. Chele de più valuta. A rejon. El rua dant del scomenz, trop dant. Ela rua dò. El l vegn ite dal porton de cencia. Ela da chel de dreta. Canche la rua se sent l bot del porton. Se capesc che l'é ela zenza cogner se utar. De fat nience el no se outa. Le vibrazion del teac de fer, olache rodola le rodele del caret de ela, le rua fin via da noi. Ela la resta te la bancada de detra. I doi se reconjonc dò la Comunion. Enlouta la se met apede e la se outa envers de el. La auza la veiada e la lo saluda con de beliscimes eies brugn velé de rimmel.
La terza cobia la é più joena che la pruma e la seconda. No sé se i é maridé. I deventa cobia da sera. No sé coche i passa le giornade. Soa ciasa la é de doi metri quadrac. I la met su te n sent e n amen, sobito do che va ju l soreie. Se no fossa per l trist de soa condizion de zenza-cuert fosse n reality che vardasse con nteres. Da marevea coche n cianton de na galeria anter ciases zenza carater pel deventar na vera cambra. Ciauda e da dignità. Doi lec con piumac e piumin, biancheria e dut l rest. La jent la passa tedant. Chel moment che saon da embaraz. Per se fermar ge vel aer l coraje de se confrontar co la povertà. Ela la chiama duc. La proa a ciacolar con duc. Soa rejonada no la é da entener foneticamenter. Mpò l messaje l rua. Se fermar l'é n vadagn. De simpatia e amizizia. Pélel esser amizizia anter una zenza un cuert e zachei che de cuerc la n'à più che un? Voi dir, se pélel star n bilich anter doi monc coscita desvalives? Entan che ela se dona te la relazion, el l speta tedant a la gejia alò apede. No l disc trop. L lascia parlar la man che la se sporc a scuier. Dapò l va da ela. Te l' "open space".
No se pel ciapar zenza dar. No se pel star al mond zenza tor part.
L'é la cuarta cobia. La mia. Fossa bel festejar l cincantadoiesim cedean. Ruar, anter auc e basc. Descheche aon fat fin ades per vintesie egn. Epura no l'é na rejon, coscita a veder, de star adum. L besen de compagnia, per l ben di bec, per na emprometuda tedant a Die, per aer zachei con chel che se pel programar l davegnir? Nia de dut chest ge dasc forma a chel perché. Ajache chel perché no l se lascia ciapar ite e l se fasc entraveder demò te la confidenza, te la condivijion, te la sintonia, te le veiade. De le autre cobie, no de toa. Medeac. Saete de comprenjion. Banalmenter. Chele picole robe che revestesc l'amor.